अभिनेत्री बनण्याचे स्वप्न उराशी बाळगून उत्तराखंडमधून मुंबईत आलेल्या एका युवतीवर निर्मात्याने बलात्कार केल्याची घटना उघड झाली आहे. या २२ वर्षीय पीडित युवतीने निर्माता करण वाही आणि संगीतकार एम. एस. नागर यांच्या विरोधात मुंबईतील चारकोप पोलीस ठाण्यात तक्रार दाखल केली आहे. पीडित युवती एमबीए केल्यानंतर अभिनेत्री बनण्यासाठी मुंबईत आली होती. 

पोलिसांनी दिलेल्या माहितीनुसार, पीडित युवती आपल्या मैत्रिणींद्वारे करण वाही आणि त्याचा मित्र एम. एस. नागर यांच्या संपर्कात आली. या दोघांनाही आपल्या चित्रपटासाठी अभिनेत्रीची गरज होती. काही दिवसांपूर्वी करणने पीडित युवतीला चारकोपमधील आपल्या फ्लॅटवर बोलावले. तेथे एम. एस. नागरही उपस्थित होता. करणने थंड पेयात गुंगीचे औषध मिसळून पीडित युवतीला प्यायला दिले आणि त्यानंतर दोघांनी तिच्यावर बलात्कार केला.

पीडित युवती या फ्लॅटमध्ये सुमारे १८ तास होती. ती शुद्धीवर आल्यानंतर आपण बिछान्यावर नग्नावस्थेत असल्याचे तिला आढळले. कशी बशी आपली सुटका करून घेत या युवतीने त्यानंतर आपल्या मैत्रिणीचे घर गाठले. त्यानंतर मैत्रिणीच्या मदतीने युवतीने चारकोप पोलीस ठाण्यात तक्रार नोंदवली. चारकोर पोलिसांनी पीडित युवतीच्या तक्रार दाखल केल्यानंतर सीसीटीव्ही फुटेजची तपासणी केली. यात दोघेही आरोपी युवतीसोबत असल्याचे दिसले.