एमकॉमचे शिक्षण घेत असतानाच पीडित २५ वर्षीय तरुणीला दोन वर्षांपूर्वी पुण्यातील इब्राहिम सुलतान मलिक याने फेसबुकवर फ्रेण्ड रिक्वेस्ट पाठवली होती. तरुणीने ही रिक्वेस्ट स्वीकारल्यानंतर दोघेही एकमेकांशी चॅटिंग करू लागले. दोघांमध्ये प्रेमसंबंध जुळल्यानंतर मलिकने फोन करून त्याने तिला पळून जाऊन लग्न करण्याचे तसेच घरातील सर्व दागिने घेऊन येण्यासाठी सांगितले. २७ एप्रिल रोजी सकाळी तरुणी कामाला जाते, असे सांगून घरातून दागिने घेऊन बाहेर पडली. दुपारी दीड वाजता तरुणी ठाणे रेल्वे स्थानक येथे गेली. तिने दागिन्यांच्या पिशवीसोबत क्रेडिट आणि डेबिट कार्डही त्याला दिले. त्यानंतर तू याठिकाणी थांब. पुण्याला जाण्यासाठी दोघांचे तिकीट काढून येतो, असे सांगून मलिक निघून गेला. नंतर तो पुन्हा आलाच नाही. तरुणीने त्याचा शोध घेऊनही सापडला नाही. तिने मलिकला फोन करूनही संपर्क न झाल्याने अखेर तरुणी ऑफिसला परतली. तीन दिवसांनी त्याच्याशी संपर्क झाल्यानंतर त्याने आपण लखनऊला असल्याचे सांगितले आणि त्याने उडवाउडवीची उत्तरे दिली. तरुणीने सोन्याची मागणी केल्यानंतर सोने विकल्याचे मलिकने सांगितले.