मुंबई: डी-कंपनीत सध्या उभी फूट पडल्याचं समजतं. कुख्यात गुंड दाऊद इब्राहिमचा पुतण्या इकबाल कासकर याचा मुलगा रिझवानला खंडणी आणि धमकावणे या आरोपांखाली मुंबई पोलिसांनी अटक केली आहे. रिझवाननं छोटा शकीलचा 'खास' साथीदार फहीम मचमच याच्या 'आदेशावर' ही सुपारी घेतल्याचं समोर आलं. हे समजल्यानंतर दाऊद चांगलाच भडकला. त्यानं रिझवानच्या अटकेच्या दुसऱ्याच दिवशी मचमचला फोन केला आणि त्याची खरडपट्टी काढली, असं सूत्रांनी सांगितलं. 

भाऊ नुराचा मुलगा सोहेल कासकरच्या अटकेनंतर आधीच दाऊद संतापला आहे. त्याच्यावर अंमली पदार्थांच्या तस्करीसह अमेरिकेत हेरॉइन पाठवल्याचा आरोप होता. इकबालला गेल्या वर्षी खंडणीच्या एका प्रकरणात अटक झाली होती. त्यात आता रिझवानला अटक झाली आहे. त्यामुळं अंडरवर्ल्ड डॉन दाऊद प्रचंड संतापला आहे. सूत्रांच्या माहितीनुसार रिझवानच्या अटकेला छोटा शकीलचा खास पंटर फहीम मचमच कारणीभूत असल्याचं दाऊदला वाटतं. त्यामुळं रिझवानच्या अटकेच्या दुसऱ्या दिवशीच दाऊदनं यूएईमध्ये असलेल्या मचमचला फोन करून फैलावर घेतलं. भडकलेल्या दाऊदची समजूत काढण्यासाठी मचमच कराचीला गेला होता, असं बोललं जातं.