देशभरातील तरुणांना नोकरी मिळवून देण्याच्या बहाण्याने लाखोंचा गंडा घालणाऱ्या बोगस कॉल सेंटरचा माटुंगा पोलिसांनी पर्दाफाश केला. पोलिसांनी उत्तर प्रदेश आणि नवी दिल्ली येथे छापा टाकून चौघांना अटक केली असून यामध्ये एका महिलेचा समावेश आहे. सरकारी आणि चांगल्या पगाराच्या खासगी नोकरीचे आमिष दाखवून त्यांनी अनेकांना फसविले असल्याचे चौकशीतून स्प्ष्ट झाले आहे.

सरकारी किंवा खासगी क्षेत्रात चांगल्या पगाराची नोकरी मिळत असेल तर नागरिकांची काहीही करण्याची तयारी असते. त्यातच आता अनेक संकेतस्थळांवरून नोकऱ्या पुरविल्या जातात. माटुंग्यातील एका तरुणाने अशाच एका संकेतस्थळावर नोंदणी केली आणि आपला बायोडेटा अपलोड केला. यानंतर काही दिवसांतच त्याला विविध नंबरवरून फोन आले. नोकरीच्या अनेक ऑफर देण्यात आल्या. 'फ्री स्काय लक्झरी ट्रॅव्हल्स सोल्युशन' या दिल्लीच्या कंपनीकडून इंडिगो एअरलाइन्समध्ये चांगल्या पगाराच्या नोकरीची ऑफर देण्यात आली. ही नोकरी मिळविण्यासाठी नोंदणी, इन्शुरन्स, मुलाखत अशी वेगवेगळी कारणे सांगून त्याच्याकडून एक लाख तीस हजार रुपये घेण्यात आले. ही रक्कम त्याने विविध बँक खात्यांवर जमा केली. मात्र ज्या नंबरवरून फोन येत होते, ते बंद झाले. फसवणूक झाल्याचे लक्षात येताच या तरुणाने माटुंगा पोलिस ठाण्यात तक्रार केली.

पोलिस उपायुक्त सौरभ त्रिपाठी, वरिष्ठ पोलिस निरीक्षक सोनावणे यांच्या मार्गदर्शनाखाली उपनिरीक्षक मारुती शेळके, शिल्पा ठेंगे यांच्या पथकाने तपस सुरू केला. तांत्रिक पुरावे आणि बँक खात्यावर झालेले आर्थिक व्यवहार पडताळत असताना उत्तरप्रदेशच्या रामपूरमधील एका महिलेचे नाव पुढे आले. पोलिसांच्या पथकाने उत्तरप्रदेशातून या महिलेले ताब्यात घेतले. त्यावेळी दिल्लीजवळील नोएडा येथून काही साथीदारांच्या मदतीने कॉल सेंटर चालविले जात असल्याचे तिने सांगितले. या माहितीआधारे पोलिसांनी तिथे जाऊन या कॉल सेंटरवर छापा टाकला. या महिलेसह अंकुर सिंग, अमनकुमार सिंग आणि शेहजाद मकबूल या चौघांना अटक करण्यात आली. त्यांच्याकडून १९ मोबाइल, २० सीमकार्ड, लॅपटॉप, डेटा कार्ड तसेच इतर साहित्य हस्तगत करण्यात आले. या सर्वांना न्यायालयाने ३१ ऑगस्टपर्यंत पोलिस कोठडी सुनावली आहे.

एका इन्शुरन्स कंपनीत असिस्टंट मॅनेजर म्हणून काम करणाऱ्या तरुणाला ५० हजार रुपयांचा गंडा घालण्यात आल्याचा प्रकार पवईमध्ये उघडकीस आला आहे. चांगल्या पगाराच्या नोकरीसाठी त्याने अर्ज केला होता. विमानतळ प्राधिकरण येथे नोकरी असल्याचे सांगून त्याच्याकडून पैसे उकळण्यात आले. पैसा परत मागितले, तर आधी जीएसटी नऊ हजार भरा, असे सांगण्यात आले. अखेर या तरुणाने पवई पोलिसांत तक्रार केली.