मुंबई: राज्यातील बेकायदेशीर स्थलांतरितासांठी (घुसखोर) नवी मुंबईतील नेरूळ येथे महाराष्ट्रातील पहिले डिटेंशन सेंटर उभारण्यात येणार आहे. राज्याच्या गृह विभागाने गेल्याच आठवड्यात सिडकोला पत्र पाठवून डिटेंशन सेंटरसाठी नेरूळमध्ये तीन एकर जागेची मागणी केली आहे.

आसाममध्ये नुकतीच राष्ट्रीय नागरिक नोंदणीची (एनआरसी ) अंतिम यादी जाहीर झाल्यानंतर राज्य सरकारचा हा निर्णय महत्त्वाचा मानला जात आहे. आसाममध्ये सुमारे १९ लाख लोक यादीबाहेर गेल्याचे स्पष्ट झाले आहे.

गृह विभागातील सूत्रांनी मात्र नेरूळ येथे प्रस्तावित डिटेंशन सेंटरची नेमकी जागा कोणती याबाबत माहिती देण्यास नकार दिला. या जागेवर सध्या एक भवन असून एक सामाजिक संस्था तिचा वापर करत असल्याचे सूत्रांनी सांगितले. डिटेंशन सेंटरसाठी जागा निवडण्याची प्रक्रिया जुलै महिन्यात सुरू करण्यात आली असून तसे निर्देश केंद्र सरकारने सर्व राज्य सरकारांना देण्यात आल्याची माहिती राज्याच्या गृह विभागाचे मुख्य सचिव (विशेष) अमिताभ गुप्ता यांनी माहिती देताना सांगितले.

गेल्या रविवारी शिवेसेनेचे खासदार आणि केंद्रीय अवजड उद्योग मंत्री अरविंद सावंत यांनी मुंबईत एनसीआर लागू करण्याची मागणी केली होती. मुंबईत मोठ्या संख्येने बांगलादेशी घुसघोर राहत असल्याची माहिती एका प्रशासकीय अधिकाऱ्याने दिली. या घुसखोरांना त्यांच्या देशात पाठवण्याच्या प्रक्रियेला वेळ लागेल आणि याच कारणासाठी डिटेंशन सेंटरची आवश्यकता असल्याचे अधिकाऱ्याचे म्हणणे आहे. सध्या काही घुसखोरांना तुरुंगात ठेवण्यात आले आहे.

नेरूळमध्ये प्रस्तावित डिटेंशन सेंटर तुरुंगासारखे असणार नाही. यात ठेवण्यात येणाऱ्या घुसखोरांना अनेक प्रकारच्या सोयीसुविधा पुरवण्यात येतील अशी सूत्रांची माहिती आहे. इथे एकाच कुटुंबातील लोकांना एकत्र ठेवण्यात येणार आहे. तसेच सेंटरमध्ये पाळणाघरही असणार आहे.