श्रावणामध्ये काही काळ विश्रांती घेतलेल्या पावसाला गणपती उत्सवापासून पुन्हा सुरुवात झाली. दीड दिवस, पाच दिवस, गौरी-गणपती, सात दिवस अशा प्रत्येक विसर्जनाला बाप्पाला पावसाच्या धारांनी निरोप दिला. मात्र आता अनंत चतुर्दशीच्या दिवशी पाऊस मुंबईमध्ये जराशी उसंत घेईल, असा अंदाज आहे. त्यामुळे अनेक गणेशभक्तांना विसर्जन सोहळ्यामध्ये उत्साहाने सहभागी होता येणार आहे.

मुंबईमध्ये सोमवारी दुपारनंतर पावसाचे प्रमाण कमी झाले. मंगळवारी दिवसभरात मुंबईत एखादीच सर कोसळली. त्यामुळे गणपती दर्शनासाठीही शेवटच्या दोन दिवसांमध्ये आता गर्दी झाली आहे. पावसाने यंदा गणेशोत्सवाचा आनंदच घ्यायला मिळाला नाही अशी भावना अनेक मुंबईकरांमध्ये निर्माण झाली होती. आता किमान विसर्जनाच्या दिवशी चौपाटीवर वेगवेगळ्या बाप्पांचे दर्शन घेता येईल, मूर्तीची भव्यता पाहता येईल याचा उत्साह पाऊस थांबल्याने गणेशभक्तांमध्ये निर्माण झाला आहे.

सध्याच्या मॉडेलच्या स्थितीनुसार कोकण विभागामध्ये गुरुवारी हलक्या ते मध्यम सरींचा अंदाज आहे. तर मध्य महाराष्ट्रातही पावसाचे प्रमाण कमी होण्याची आशा आहे. प्रादेशिक हवामान विभागाने दिलेल्या अंदाजानुसार केवळ कोकणच नाही तर संपूर्ण महाराष्ट्रामध्येच पावसाचे प्रमाण कमी असेल. बुधवारी पालघर, रायगड, रत्नागिरी, नाशिक, पुणे, सातारा येथील घाट परिसरामध्ये एखाद-दुसऱ्या ठिकाणी मुसळधार पाऊस पडू शकतो. मात्र गुरुवारी ही परिस्थिती सुधारून राज्यभरात हलक्या ते मध्यम सरींचा अंदाज वर्तवण्यात आला आहे. राज्यामध्ये पाऊस पुन्हा पुढील आठवड्यात सक्रीय होण्याची शक्यता आहे. मात्र यासंदर्भात वर्तवण्यात येणारे अंदाज नागरिकांनी वेळोवेळी पाहावेत असे हवामान विभागाकडून स्पष्ट करण्यात येत आहे.