मुंबई: मध्ये पुन्हा एकदा पावसाचा जोर वाढला असून बुधवार दुपारनंतर त्याचा जोर तुरळक ठिकाणी वाढू शकेल तर गुरुवारी ठाणे आणि मुंबईला रेड अलर्ट देण्यात आला आहे. बुधवारी कुलाबा येथे सायं. ५.३० पर्यंत १६.८ तर सांताक्रूझ येथे ०.२ मिलीमीटर पावसाची नोंद झाली. ठाणे, नवी मुंबई येथे पावसाचा जोर वाढला होता तर शहरामध्ये मधूनच एखादी जोरदार सर येऊन जात होती. मात्र ही परिस्थिती बुधवारी दुपारनंतर तीव्र होऊ शकते. तर गुरुवारी ठाणे आणि मुंबईमध्ये तुरळक ठिकाणी अती तीव्र मुसळधार सरींची शक्यता आहे.

भारतीय हवामान विभागाने दिलेल्या इशाऱ्यानुसार विदर्भ, कोकण आणि गोवा येथील तुरळक ठिकाणी मुसळधार ते तीव्र मुसळधार सरी बुधवारी कोसळू शकतात. तर मराठवाड्यातही तुरळक ठिकाणी मुसळधार पावासाचा अंदाज आहे. गुरुवारी कोकण आणि गोव्यामध्ये तुरळक ठिकाणी अती तीव्र मुसळधार सरी कोसळण्याचा अंदाज आहे. विदर्भ, मध्य महाराष्ट्र येथे मुसळधार ते अती मुसळधार पावसाच्या सरींची शक्यता आहे. मुंबईत मंगळवारी काही ठिकाणी ढगांचा गडगडाटही झाला. शुक्रवारपर्यंत मुंबईमध्ये या पावसाची उपस्थिती असेल, अशी शक्यता आहे.