नोएडा: जर तुम्ही रात्रीच्या वेळी जिममध्ये जात असाल कर सावधान! हे तुमच्या जीवावर बेतू शकतं. रात्रीच्या वेळी ट्रेडमिलवर धावत असताना एक २४ वर्षीय सॉफ्टवेअर इंजिनीअर अचानक चक्कर येऊन बेशुद्ध पडला. त्या तातडीने जवळच्या रुग्णालयात दाखल करण्यात आले. मात्र डॉक्टरांनी त्याला मृत घोषित केले. नोएडा सेक्टर ७६ मघ्ये जेएम ऑर्किड सोसायटीच्या जिममध्ये ही घटना घडली. या तरुणाचा हृदयविकाराच्या धक्क्याने मृत्यू झाल्याचा संशय व्यक्त होत आहे. या प्रकरणाचा तपास सुरू आहे.

या घटनेबाबत मिळालेल्या अधिक माहितीनुसार, मृत पावलेल्या तरुणाचे नाव यश उपाध्याय असे आहे. तो मूळचा उत्तराखंडमधील नैनीताल जिल्ह्यातील रामनगरचा रहिवाशी होता. यश आपल्या आई-वडिलांचा एकुलता एक मुलगा होता. इंजिनीअरिंग केल्यानंतर यशला नेटवर्किंगचा कोर्स करायचा होता. त्यासाठी तो नोएडातील सेक्टर ७६ मध्ये असलेल्या जेएम ऑर्किड सोसायटीत राहणआऱ्या आपले काका आरएन जोशी यांच्या घरी आला होता.

यश रोज सकाळी सोसायटीच्या आत असलेल्या जिममध्ये व्यायामासाठी जायचा अशी माहिती जोशी यांनी दिली. बुधवारी सकाळी त्याला जिमला जायला वेळ मिळाला नाही. यामुळे तो संध्याकाळी ७.३० च्या सुमाराला जिमला गेला. तिथे त्याने ट्रे़डमिलवर धावणे सुरू केले. त्याचवेळी त्याला चक्कर आली आणि बेशुद्ध पडला अशी माहिती जोशींनी दिली.

यश जिममध्ये खाली कोसळल्यानंतर तेथील लोकांनी त्याला जवळच्या सेक्टर ५० मध्ये असलेल्या नियो रुग्णालयात नेले. मात्र डॉक्टरांनी त्याला तपासल्यानंतर मृत घोषित केले. माहिती मिळताच यशचे काका रुग्णालयात पोहोचले. त्यानंतर त्यानी मृतदेह ताब्यात घेतला. गुरुवारी शवविच्छेदन करण्यात आले. त्यानंतर मृतदेह रामनगरला रवाना झाला. शवविच्छेदन अहवालात काय आहे, हे अद्याप स्पष्ट झाले नसल्याचे जोशी म्हणाले. मात्र, यशचा मृत्यू हृदयविकाराच्या धक्क्याने झाला असावा असा अंदाज व्यक्त होत आहे.