मुंबई: रिझर्व्ह बँकेने पंजाब महाराष्ट्र सहकारी बँकेवरील (पीएमसी) निर्बंधाने बँकेतील हजारो खातेधारकांचे धाबे दणाणले आहेत. त्याच अनुभवातून या बँकेत खाते असलेल्या बेस्ट उपक्रमातील कामगारांना जावे लागत आहे. पीएमसी बँकेशी अनेक वर्षांपासून ऋणानुबंध असलेल्या शेकडो बस कामगारांपुढे आर्थिक प्रश्न निर्माण झाला आहे. त्याचवेळी, कामगार संघटनांनी तातडीने पीएमसी बँकेत खाते असलेल्या कामगारांना पुढील पगार दुसऱ्या बँक खाते वा धनादेशाच्या             रूपाने   देण्याचा             निर्णय    बेस्ट      प्रशासनाने             घेतला    आहे.
पीएमसी बँकेतील खातेधारकांमध्ये बेस्टमधील कामगारांचाही मोठ्या प्रमाणात समावेश आहे. प्राथमिक अंदाजानुसार साधारण ५०० पर्यंत तरी बेस्ट कामगारांची खाती पीएमसीच्या वेगवेगळ्या शाखांमध्ये आहे. त्यातील बरीचशी बचत खाती असून कामगारांच्या सूचनेनुसार उपक्रमातून मासिक पगाराची रक्कम पीएमसी बँकांच्या शाखांमध्ये जमा होते. पीएमसी बँकेवरील आर्थिक निर्बंधांनी हवालदिल झालेल्या खातेधारकांमध्ये बेस्ट कामगारांचाही समावेश आहे. गुरुवारी बँकेने प्रत्येक महिन्यास बचत खात्यातून १० हजार रुपये काढण्यास अनुमती दिल्याने ग्राहकांना थोडा दिलासा देण्याचा प्रयत्न केला आहे. पण, खातेधारकांची चिंता सरलेली नसल्याचे चित्रही गुरुवारी होते.

पीएमसी बँकेवरील निर्बंधाने बेस्टच्या कामगारांपुढेही आर्थिक आव्हाने निर्माण झाली आहेत. काही महिन्यांपूर्वी वेळच्या वेळी पगार मिळणेही कठीण झाले होते. आता पगार वेळेत मिळण्यास सुरुवात झाली तर बँकेसमोर अडचण आल्याची खातेधारक कामगारांची प्रतिक्रिया आहे. बेस्टमध्ये गेले १२ वर्षे ड्रायव्हर असलेले मुकेश चंदन यांचे पीएमसीच्या घाटकोपरमधील रावळी कॉलनीतील शाखेत खाते आहे. बँकेवर निर्बंध आल्याचे कळताच पायाखालची जमीन सरकल्यासारखे वाटले, आता १० हजार रुपये काढता येत असले तरीही प्रश्न काही मिटलेला नसल्याचे ते सांगतात.