फेसबुकवर नवीन मित्र-मैत्रिणी शोधताय, जरा जपून. बोगस नाव, बनावट फोटो वापरून मैत्री करून फसवणुकीच्या घटना वाढल्या आहेत. महागडे गिफ्ट, व्यवसाय, लग्नाचे तसेच गुंतवणुकीचे आमिष, लग्नाचे आमिष दाखवून फेसबुकवरील बोगस मित्र-मैत्रिणी लाखो रुपयांचा गंडा घालत आहेत. उच्चशिक्षित तरुण-तरुणी या भामट्यांचे लक्ष्य ठरत असल्याचे फसवणुकीच्या घटनांवरून समोर आले आहे.

सध्या मोबाइलमुळे इंटरनेट आणि पर्यायाने सोशल मीडिया सर्वांच्याच हाती आला आहे. फेसबुक, व्हॉट्सअॅप, इन्स्टाग्राम, मेसेंजर यांसारख्या अनेक सोशल मीडियाचा वापर प्रचंड वाढला आहे. ज्या वेगाने सोशल मीडियाचा वापर वाढला त्या तुलनेत त्याचा वापर कसा करावा याबाबत जनजागृती होत नसल्याने त्याचा फटका सोशल मीडियाचा वापर करणाऱ्यांना बसत आहे. ऑनलाइन भामटे फेसबुकवरून तरुण-तरुणींना लक्ष्य करीत असून खोटे नाव, दुसऱ्याचा फोटो वापरून तयार केलेल्या फेसबुक प्रोफाइलवरून अनेकांना फ्रेंड रिक्वेस्ट पाठवली जाते. अनेकांपैकी काही जण या रिक्वेस्टला प्रतिसाद देतात. प्रतिसाद दिलेल्यांशी मैत्री करून त्यांचे संपर्क क्रमांक मिळवले जातात. व्हॉट्सअॅपवर चॅटिंग तसेच संभाषण करून त्यांच्या कौटुंबिक आणि आर्थिक परिस्थितीचा अंदाज घेतला जातो. त्यानुसार सहानुभूती दाखवत त्यांना प्रेमाच्या जाळ्यात ओढले जाते. त्यानंतर वेगवेगळी करणे सांगून पैसे उकळले जात असल्याचे प्रकार मुंबईतील पोलिस ठाण्यात दाखल होणाऱ्या तक्रारींवरून पुढे आले आहे.

माटुंगा येथे खासगी शिकवणी घेणाऱ्या शिक्षिकेला परदेशातील मित्राने भारतात भागीदारीमध्ये व्यवसाय सुरू करण्याचे आमिष दाखवून चार लाख ७० हजारांचा गंडा घातला.

- फेसबुकवरील लंडनच्या मैत्रिणीने गिफ्ट पार्सल पाठविल्याचे सांगून वेगवेगळी कारणे देत साकिनाका येथील तरुणाकडून सवा लाख रुपये उकळले.

- लंडनमध्ये मरीन इंजिनीअर असल्याचे सांगणाऱ्या मित्राने विलेपार्ले येथील महिलेला पाच लाख रुपयांना फसविले.

- वर्सोवा येथील तरुणांनी महागड्या गिफ्टच्या नादात एक लाख चाळीस हजार रुपये गमावले.

- विलेपार्ले येथील एका व्यापाऱ्याला फेसबुकवरील मैत्रिणीने चार लाखांना फसविले.

ही काळजी घ्या
- अनोळखी व्यक्तीला फ्रेंड रिक्वेस्ट पाठवू नका अथवा स्वीकारू नका.
- सोशल मीडियावर फोटो, व्हिडीओ सर्वांनाच दिसतील असे ठेऊ नका.
- महिलांनी संपर्क, पत्ता तसेच इतर वैयक्तिक माहिती टाळावी.
- माहितीची शहानिशा केल्याशिवाय आर्थिक व्यवहार करू नका.
- आर्थिक देवाणघेवाण करण्यापूर्वी कुटुंबाला कल्पना द्या.
- कोणत्याही आमिषाला बळी पडू नका.
- फसवणूक होत असल्याचे लक्षात येताच पोलिसांना माहिती द्या.