सोनपेठ (परभणी): राज्य आणि देशभरात दिवाळीचा सण साजरा होत असताना परभणी जिल्ह्यातील सोनपेठमध्ये शोककळा पसरली आहे. सोनपेठमध्ये पाडव्याची पहाट सुरू होत असताना सततच्या पावसाने घराची भिंत कोसळून बाप-लेकाचा दुर्दैवी अंत झाला आहे. या घटनेमुळे सोनपेठ परिसरात हळहळ व्यक्त होत आहे. अरुण टेकाळे (४५) आणि मंदार टेकाळे (८) अशी मृत पावलेल्या बाप-लेकांची नावे आहेत. तर या दुर्घटनेत कस्तुरबा टेकाळे(४०) या जखमी झाल्या आहेत.

टेकाळे कुटुंब सोनपेठमधील देवी मंदिर पसिरात गावरस्कर यांच्या जु्न्या वाड्यात भाड्याने राहात होते. पाडवा सुरू होत असतानाच पहाटे साडेचार वाजता घराची भिंत कोसळली. भिंत कोसळत असताना टेकाडे बाप-लेकाच्या अंगावर वरील फरशीचा स्लॅब कोसळला. यात दोघांचा जागीच दुर्दैवी मृत्यू झाला.

पहाटे भिंत पडल्याचा मोठा आवाज झाला. यानंतर आजूबाजूच्या रहिवाश्यांनी वाड्याकडे धाव घेतली. बाप-लेकाचा जागीच मृत्यू झाला होता. मात्र, कस्तुरबा टेकाडे सतत आवाज देत होत्या. त्यांचा आवाज ऐकून शेजाऱ्यांनी दरवाजा तोडून आत प्रवेश केला आणि कस्तुरबा यांना बाहेर काढले. अरुण आणि मंदार हे दबले गेल्याने त्यांना मात्र बाहेर काढता आले नाही. थोड्या वेळात पोलिसांनी घटनास्थळी धाव घेतली. त्यांनंतर काही धाडसी युवकांनी पोलिसांच्या समक्ष दोघांना ढिगाऱ्याखालून बाहेर काढले.

सोनपेठ परिसरात अनेक जुने वाडे आहेत. इथे कोसळणाऱ्या सततच्या पावसामुळे या जुन्या वाड्यांच्या भिंती ढासळायला सुरुवात झाली आहे. लोक इथे अक्षरश: आपला जीव धोक्यात घालूनच राहात आहेत. सोनपेठ परिसरात अनेक जुने वाडे आहेत. इथे कोसळणाऱ्या सततच्या पावसामुळे या जुन्या वाड्यांच्या भिंती ढासळायला सुरुवात झाली आहे. लोक इथे अक्षरश: आपला जीव धोक्यात घालूनचराहात आहेत.