सायन कोळीवाडा येथील शांती नगर SRA को-ऑपरेटिव्ह हाउसिंग सोसायटी मधील इलेक्ट्रिसिटी केबिनला आज भीषण आग लागल्याची घटना घडली. सुदैवाने या आगीत कोणतीही जीवित हानी झाली नाही, मात्र ही घटना प्रशासनाच्या आणि संबंधित यंत्रणांच्या निष्काळजीपणावर मोठा प्रश्नचिन्ह निर्माण करणारी ठरली आहे.

आगीची माहिती मिळताच अग्निशमन दलाचे अधिकारी तात्काळ घटनास्थळी दाखल झाले. मात्र, घटनास्थळालगत असलेल्या सनातन धर्म हायस्कूल समोर एका डेकोरेटरने थेट रस्त्यावर मंडप उभारल्यामुळे अग्निशमन गाड्यांना मोठ्या अडचणींचा सामना करावा लागला.

या बेजबाबदार कृत्याचा सर्वाधिक फटका शाळकरी मुले आणि त्यांच्या पालकांना बसला. आगीच्या धुरामुळे, गोंधळामुळे आणि अरुंद झालेल्या रस्त्यामुळे लहान मुले, महिला व पालक नाहक भीती आणि संकटात सापडले. आपत्कालीन परिस्थितीतही रस्ता मोकळा न ठेवणे म्हणजे थेट जीवाशी खेळ असल्याची संतप्त प्रतिक्रिया स्थानिक नागरिकांतून उमटत आहे.

डेकोरेटरवर तात्काळ कारवाई का नाही? शाळेसमोर मंडपाची परवानगी दिलीच कशी? असे थेट प्रश्न उपस्थित होत असून, अशा निष्काळजीपणामुळे भविष्यात मोठी दुर्घटना घडल्यास त्याची जबाबदारी कोण घेणार, असा सवाल आता नागरिक विचारत आहेत.

स्थानिक नागरिकांनी महापालिका, पोलीस प्रशासन आणि अग्निशमन विभागाने या प्रकरणाची गंभीर दखल घेऊन दोषींवर कठोर कारवाई करावी, तसेच शाळा व आपत्कालीन मार्ग मोकळे ठेवण्याचे स्पष्ट आदेश द्यावेत, अशी ठाम मागणी केली आहे.