सुमारे १८ हजार कोटी रुपये खर्चाच्या आणि ३३.५ किमी लांबीच्या देशातील पहिल्याच अशा कुलाबा- सिप्झ भुयारी मेट्रोचा २४ किलोमीटर लांबीचा मार्ग पूर्ण झाला असून डिसेंबर २०२१ मध्ये वांद्रे- कुर्ला संकुल (बीकेसी) ते आरे वसाहतदरम्यान पहिली मेट्रो धावू लागेल, अशी माहिती ‘मुंबई मेट्रो रेल कार्पोरेशन’च्या (एमएमआरसी) वरिष्ठ अधिकाऱ्याने दिली.

या प्रकल्पातील पहिल्या टप्याच्या आरे वसाहत ते बीकेसी दरम्यानच्या १२ किलोमीटर लांबीच्या मेट्रो मार्गाचे काम युद्धपातळीवर सुरू असून डिसेंबर २०२१पर्यंत हा टप्पा प्रवासी वाहतुकीसाठी खुला केला जाईल. तर बीकेसी ते कफ परेड दरम्यानच्या २१ किमी लांबीच्या दुसऱ्या टप्प्याचे काम मे २०२२ पर्यंत पूर्ण करण्याचे नियोजन आहे. तथापि, अजूनही आरेमध्ये कारडेपोसाठी झाडे तोडण्याची परवानगी वृक्षप्राधिकरणाकडून मिळालेली नसल्याने काम लांबू शकते, असेही या अधिकाऱ्याने सांगितले.