टेकडीवरील कचऱ्याचा ढीग पायथ्याशी असलेल्या घरावर कोसळल्यानं एका व्यक्तीचा त्याखाली दबून मृत्यू झाल्याची धक्कादायक घटना आज कुर्ला पूर्वेकडील कुरेशी नगरमध्ये घडली. अब्दुल रशिद कुरेशी (वय ४८) असं मृताचं नाव आहे. तर एक वृद्ध महिला जखमी झाली आहे. 

महापालिका अधिकाऱ्यांच्या माहितीनुसार, झोपडपट्टीतील रहिवासी काही महिन्यांपासून टेकडीवर कचरा आणि भंगार टाकत आहेत. या टेकडीच्या पायथ्याशी असलेल्या घरावर आज कचऱ्याचा ढीग कोसळला. त्याखाली ४८ वर्षीय अब्दुल रशिद कुरेशी आणि एक ६५ वर्षीय महिला दबली. त्या दोघांनाही काही वेळानं बाहेर काढण्यात आलं. त्यांना रुग्णालयात नेलं असता तिथे अब्दुलला मृत घोषित केलं.