बेस्ट बस चालवण्याचे प्रशिक्षण घेतलेल्या मेकॅनिकला नेमक्या रस्त्यावरील बदलांची यत्किंचितही कल्पना नसण्यातून बुधवारी मध्यरात्री डबलडेकर बसला अपघात झाला. ही बस वाकोल्यातील लोखंडी चौकटीस रात्री १.३० वाजता धडकली. या अपघातात कोणीही जखमी झाले नाही. ही बस चालकाऐवजी मेकॅनिक चालवत होता. अंधेरी कुर्ला मार्गाऐवजी शॉर्ट कट घेण्याच्या मोहात मेकॅनिकने पश्चिम द्रुतगती महामार्ग गाठले आणि अपघात झाला. ही बस रात्री १ वाजता मरोळ आगारातून कुर्ला आगाराच्या दिशेने जात होती. तेव्हा वाकोला पुलाकडे येतानाच अवजड वाहनांना प्रवेश रोखणाऱ्या लोखंडी चौकटीस आदळली. ही बस प्रवासी सेवेसाठी नसल्याने मेकॅनिक चालवत होता. त्याप्रकारच्या प्रवासासाठी मेकॅनिकने बस चालवण्यास अनुमती आहे. पण त्यास रस्त्यांमध्ये केलेल्या बदलांबाबत काहीही माहिती नसल्याने हा अपघात झाल्याचा प्राथमिक अंदाज आहे. मुंबई मेट्रोने ही चौकट काही महिन्यांपूर्वीच बसवली असून तिथे सुरक्षिततेचे उपाय योजल्याचे स्पष्ट केले आहे.