गोरेगाव परिसरात शुक्रवारी एका पोलिसानेच वाहतुकीचे नियम मोडले आणि त्याबद्दल प्रश्न विचारताच उद्धट उत्तरेही दिली. या पोलिस उपनिरीक्षकाची ध्वनिचित्रफित सोशल मीडियावरून व्हायरल झाली असून त्यानंतर संबंधित पोलिस उपनिरीक्षकाविरोधात कारवाईचे आदेश देण्यात आले आहेत.

गणवेशात असाल किंवा नसाल तरी वाहतुकीचे नियम काटेकोरपणे पाळा, अशा स्पष्ट सूचना पोलिस आयुक्तांनी सर्व पोलिसांना दिल्या आहेत. मात्र संबंधित पोलिस उपनिरीक्षक विना हेल्मेट मोटरसायकल चालवत होता. त्यातही तो दुचाकी चालवताना मोबाइलवर बोलत होता. त्याने प्रत्येक सिग्नलकडे दुर्लक्ष केले आहे. या पोलिस उपनिरीक्षकाच्या वागण्याची ध्वनिचित्रफित एका दुसऱ्या मोटरसायकलचालकाने काढली केली. एका ठिकाणी संबंधित उपनिरीक्षकाला 'हेल्मट कुठे आहे, सिग्नल पाळले नाहीत', असे विचारल्यावर 'तू पोलिस नाहीस, तुला जाब विचारण्याचा अधिकार नाही, निघ इथून, मी सिग्नल मोडेन, उडवेन,' अशा पद्धतीने त्याने उत्तर दिले.