राज्य सरकारने ८० हून अधिक वय असलेल्या शासकीय कर्मचाऱ्यांना अतिरिक्त निवृत्तिवेतन देण्याचा निर्णय घेतला असल्याची माहिती अर्थमंत्री सुधीर मुनगंटीवार यांनी दिली. हे कर्मचारी ज्या महिन्यात वयाची ८०, ८५, ९०, ९५ आणि १०० वर्षे पूर्ण करतील, त्या महिन्याच्या एक तारखेपासून वाढीव दराने निवृत्तिवेतन किंवा कुटुंब निवृत्तिवेतन लागू होईल, असे मुनगंटीवार यांनी स्पष्ट केले.

वित्त विभागाने या अतिरिक्त निवृत्तिवेतनाबाबत कशा पद्धतीने कार्यवाही करावयाची आहे, त्याबाबतचा शासन निर्णय ३० जुलै २०१९ रोजी जारी केला आहे.

शासकीय निवृत्तिवेतन योजना लागू असलेले सर्व निवृत्त कर्मचारी, शाळांचे निवृत्त शिक्षक-प्राचार्य व अन्य कर्मचारी महाविद्यालयांमधील प्राध्यापक व अन्य कर्मचारी यांच्यासह सर्वाना या निर्णयानुसार अतिरिक्त निवृत्तिवेतनाचा लाभ दिला जाईल, अशी माहिती मुनगंटीवार यांनी दिली.

ज्या शासकीय कर्मचाऱ्यांचे वय ८० पूर्ण झाले आहे, त्यांच्या मूळ निवृत्तिवेतनात १० टक्के, ८५ ते ९० दरम्यान वय असल्यास मूळ वेतनाच्या १५ टक्के, ९० ते ९५ वय असल्यास २० टक्के, ९५ ते १०० वय असल्यास २५ टक्के आणि १०० हून अधिक वय असल्यास ५० टक्के इतकी अतिरिक्त वाढ देऊन निवृत्तिवेतन दिले जाईल.