मुंबई देशातील प्रथम तसेच द्वितीय श्रेणीच्या अनेक शहरांमध्ये सध्या मेट्रोच्या अनेक प्रकल्पांची कामे सुरू आहेत. यापैकी मेट्रोचे सगळ्यात मोठे जाळे मुंबईत निर्माण होत आहे. अन्य राज्यांच्या तुलनेत मुंबईत १७१ कि.मी. लांबीच्या मेट्रो मार्गाची बांधणी सुरू आहे. याचबरोबर ५७ कि.मी. विस्तारित मार्गालाही मंजुरी मिळाली आहे. बांधकाम सुरू असलेल्या मेट्रो प्रकल्पांत देशात मुंबई प्रथम क्रमांकावर आहे. देशात सध्या १२ मेट्रो मार्ग कार्यान्वित आहेत. त्यात सर्वाधिक ३४३.४ कि.मी. लांबीचा मार्ग दिल्लीत आहे. मुंबईत सध्या घाटकोपर वर्सोवा मेट्रो १ हा ११.४ कि.मी. चा मार्ग कार्यान्वित आहे. मात्र देशातील कोणत्याही राज्यातील मेट्रो मार्ग सध्या तरी दिल्लीच्या मेट्रो जाळ्याच्या आसपासही पोहोचत नाहीत. देशात सध्या ६६२.९ कि.मी.मेट्रोचे जाळे आहे. या सर्व मार्गवर मिळून ५२६ स्थानके आहेत. त्यापैकी एकट्या दिल्लीत २५० स्थानके आहेत. मुंबई मेट्रो १ मार्गावर १२ स्थानके आहेत. देशभरात विविध राज्यांमध्ये १५ मेट्रो प्रकल्पांची कामे सुरू आहेत. त्यात मुंबई मेट्रोचे जाळे सर्वात मोठे म्हणजे १७१ कि.मी. आहे. त्यानंतर चेन्नई मेट्रो १२८ कि.मी., मुंबई व्यतिरिक्त नागपुरात २४.५ कि.मी., नवी मुंबईत ११.१ कि.मी. पुण्यात ३१.५ कि.मी. लांबीच्या मेट्रोची कामे सुरू आहेत. संपूर्ण देशात ७०६ .३ कि.मी. मेट्रो मार्गांची कामे सुरू आहेत. या मुख्य मार्गांसोबत मुंबई मेट्रोच्या ५७ कि.मी., नागपूर ४८ कि.मी. व पुणे मेट्रोच्या २३ कि.मी. विस्तारित मार्गाला मंजुरी मिळाली आहे.